本週市集:《童年回憶》

我們的童年回憶

人大了,總覺得「年少多好」~大家又有無懷念小息一起霸嘅跳飛機、食完仲要戴嘅眼鏡糖、食到成手痴笠笠嘅「唧唧冰」?本地純手作市集單位-《市集生活》又同大家見面啦!今次除咗舉辦「手作市集」之外,仲會連同多個本地插畫家舉辦「插畫展覽」,展現大會主題-「童年回憶」,同大家一起回憶小時候!

我們都愛手作

《市集生活》一直堅守「手作」嘅門檻,籌備一個又一個「純手作市集」,用心支持本地手作人,一直將市集走在藝術文化之路,避免本地特色市集成為賣貨、淘寶嘅空間!而今次《市集生活 . 童年回憶》,經己是單位第4次於D2 Place 一期舉辦,經過單位精心挑選,到時將有約70檔手作單位一同參與其中!


檔主推介

Studio Theta

唔知大家啲Headphone呀USB線,會唔會好似小編咁打晒交呢?買返個皮革收納夾就喏晒!呢間小店以皮制產品為主,家居裝飾品與隨身小品為輔,照顧得咁周到,真係好窩心架姐!

Solari 日輪

‬ Solari 主題原創設計紙膠帶、手製木盒和公仔,當中更不乏豐有香港地道特色嘅作品。佢哋希望創作出來的作品,能夠不停地帶給人一種像日光般舒服而治癒嘅感覺。

Heiz Law Design

於英國全人手製作,店主運用木頭雷射切割技術,配及皮革材料,打造一對對別致嘅耳環、頸鍊等首飾。鮮花系列嘅原材料更採自英國布里斯托,所以出嚟嘅品種效果好特別架!

My Caturday

唔係賣嘢食呀!全部都係店主擅長製作嘅黏土作品,係咪幾可亂真先?風格類型由復古、可愛、森女到仿真都有!運用各式各樣黏土、繪畫等媒介呈現最美嘅手作俾大家。

Foremost Workshop

係咪巧打耳先?Foremost 嘅2位手作人運用羊毛氈及水晶膠,製作特色作品,大部分都以森林動物同大自然作主題,好似去咗童話世界咁呀!

D for ddoidoii 

依家興微型設計,連手作界都唔例外!D for ddoidoii 店主從事設計行業多年,喜歡做小手作,將人、情感、時間融入作品當中,每作品也有獨特的故事,包括櫻花樹下、海中暢泳,好鬼寫意架所有作品保證人手製作,只有一件,獨一無二! 


插畫展覽

 今次「插畫展覽」將會有 10位插畫師參展,插畫都是以童年回憶作為主題,大家可以來欣賞一下本地插畫師的心血作品,支持他們,也同時透過插畫,回憶童年時的片段。

參展單位包括:
Beloved Art Design   (左)
成立於2012年,以源自率真心靈的手繪作品,傳遞快樂、希望與自由。這是富察令兒確立自我價值的開始,也是尋夢的開始。

Joker & Ghost   (右)
插畫師Idy 筆下的Joker & Ghost,故事主要圍繞一個不懂逗人開心的小丑,及顛覆了傳統恐怖形象的兩隻鬼。Idy 希望透過他們的特性,帶出凡事不要因表面或個別身份,而對事物先下判斷,偏門題材也有成為主角的一天。為了增加香港本土特色,大多作品都係以粤語對白繪畫不同插圖於網絡分享。

河童蛋 (左)
每一隻河童蛋都帶著一顆童真的心蹦蹦跳跳到你面前,為你送上屬於你的童真。

沙沙密卡 (右)
雖然沒有讀過設計、沒有修過美術,不過沙沙密卡嘅插畫家覺得,人人拎起枝筆肯努力,都可以畫公仔畫插畫,最近仲畫咗不少以社會議題為對象嘅作品,真係充滿共鳴感架!


更多精彩活動

今次市集有好多好玩元素、聯同 Cornerfocus 打造Photo Booth、仲有抽獎小遊戲,輕易換取市集現金優惠券懷舊零食波子汽水等《市集生活 . 童年回憶》限定貼紙等!詳情請繼續留意我哋 Facebook 最新動向啦!


市集單位簡介

市集生活,由三位各有不同故事背景的手作人,合作創辦的一個手作組織及平台,透過舉辦市集、展覽、工作坊等不同的活動,讓香港的手作人能有更多的機會和渠道展示他們的作品。

FB: lifemarkethk
IG: @lifemarkethk
Email: lifemarkethk@gmail.com


市集詳情

Life Market 市集生活:《童年回憶》
內容:手作市集、插畫展覽、抽獎遊戲、影相區
日期:2月20-21日 (星期六及日)
時間:1:00 - 8:00 PM
地點:2/F, D2 Place